SINO KINA MICA, JONA, ISABELA, AT JEREMY ANG TATANGHALING KAUNA-UNAHANG “THE VOICE TEENS” GRAND CHAMPION?

Sa bansa at sa buong Asya…


 

Mula sa libo-libong nangarap at matapos ang pambihirang pinagdaanan sa mapanuring mata ng coaches at publiko, magbabakbakan na sa kanilang huling showdown ang grand finalists na sina Mica, Jona, Isabela, at Jeremy para tanghaling kauna-unahang “The Voice Teens” grand champion sa bansa at buong Asya.

 

Umaatikabong labanan ng boses ang mapapanood sa grand finale ng top-rating singing-reality show ngayong Sabado at Linggo (Hulyo 29 at 30), kung saan itotodo na ng apat ang kanilang laban para sa pamilya at pangaral.

 

Boses na lamang ng publiko ang maririnig kaya naman tanging text at online votes lang ng mga manonood ang siyang hahatol kung sino ang tatanghaling kampeon na magkakamit ng fashion package, business package, dental service package, P1 milyong cash, P1 milyong halaga ng trust fund, P2 milyong life insurance, recording at management contract sa MCA, at bagong house and lot.
Tatlong rounds ang kailangan pagdaanan ng finalists upang ligawan ang boto ng mga manonood – ang duet kasama ang kanilang coach, isang upbeat performance, at isang power ballad na siyang magiging finale song nila.
Bagama’t maraming sumusuporta at humahanga sa kanila, labis na pressure hindi lang sa pagpe-perform ang kanilang nilagpasan para lang patunayang karapat-dapat silang manatili sa kumpetisyon.

 

Marami na ang bumilib kay Mica ng Team Lea sa blind audition pa lang niyang humakot na ng 9.8 milyong views, ang pinakamataas sa lahat ng teen artists ng season. Sa simula pa lang ng kanyang laban, inihayag na niya ang kagustuhang niyang bigyang inspirasyon ang ibang kabataang sumubok ng ibang genre.

 

Nakilala man sa kanyang operatic singing, ipinakita ng pinamagatang Soprano Girl ng Surigao del Norte na kaya rin niyang umawit ng pop at lagyan ng sarili niyang tatak ang mga sikat na awitin.

 

Hinasa naman ng singing contests ang 14 taong gulang at four-chair turner na si Jona, ang Tabing Ilog Sweetheart ng Davao. Dala ang kanyang pangarap na mailipat ang pamilya sa bagong bahay mula sa mapanganib na tahanan sa tabi ng ilog, gagamitin ni Jona ang lahat ng natutunan mula sa mang-aawit na ama at kay coach Sarah.

 

Ipinakita rin ni Jona ang kanyang tapang sa pagtanggap ng mga kantang humamon sa kanyang versatility. Mula sa blind audition, naging tuloy-tuloy na ang mga papuri sa kanya dahil sa pagkanta niyang mula sa puso.

 

Gaya ni Jona, palaban din sa stage si Isabela mula Kamp Kawayan ngunit nakatanggap ng matitinding pamumuna mula sa bashers. Kaya naman hindi nagpahuli ang kanilang coaches, lalo na si coach Lea, sa pagtatanggol sa kanilang talento at abilidad sa show man o online.

 

Hindi naging madali kay Isabela ang lumaban sa show bunga ng online bullying dahil sa pagiging isang celebrity daughter niya. Upang labanan ang samu’t saring batikos, ibinunyag ng Spunky Singing Beauty ng Pampanga na pinaghirapan niya ang pwesto sa kumpetisyon at pumila rin sa Manila auditions kasabay ng libo-libong aspirants sa show.

 

Sa huli, hindi nagpatinag si Isabela kaya naman patuloy pa ring inaabangan ang astig at agaw-eksenang performances niya upang patunayang karapat-dapat siyang magkaroon ng lugar sa industriya.

 

Tumataya naman si coach Sharon kay Jeremy, ang Charming Cutie ng California, na maging kauna-unahang “The Voice” champion na magmumula sa team niya. Laki man sa Amerika si Jeremy, taglay niya ang isang pusong Pinoy.

 

Marami nang pinakilig at pinahanga si Jeremy dahil sa pagkanta niya ng madamdaming OPM ballads. Ano pa kaya ang pwede niyang ipakita sa grand finale?

 

Kaninong team manggagaling ang kauna-unahang “The Voice Teens” grand champion? Sino kina Mica, Jona, Isabela, at Jeremy ang magbibigay ng pinakanakakamanghang performances at siyang papanigan ng publiko?

 

Huwag palampasin ang kapana-panabik na bakbakan ng apat na teams sa “The Voice Teens: Grand Finale” ngayong Sabado at Linggo (Hulyo 23 at 24) sa ABS-CBN at ABS-CBN HD (SkyCable ch 167). Mapapanood din ito nang live ng mga Kapamilya sa ibang bansa sa tfc.tv/Voice. Para past episodes ng palabas, mag-login lamang sa iWant TV o sa skyondemand.com.ph para sa Sky subscribers


LizQuen and Kathniel enters Top 10 Highest Grossing Film of 2017

Star Cinema’s Two Blockbuster Films My Ex and Whys by LizQuen and Can’t Help Falling In Love by KathNiel pasok sa Top Highest Grossing Film ngayong taon.

Ang My Ex and Whys nina Liza Soberano at Enrique Gil ang kasalukuyang nasa trono bilang Highest Grossing Filipino Film of 2017 na kumita ng P270M(P341M+ Worldwide) at kasalukuyang nasa pang anim na pwesto.

Samantalang ang Can’t Help Falling In Love nina Kathryn Bernardo at Daniel Padilla ay kumita naman ng P234M (P320M+ Worldwide) at kasalukuyang nasa pang pitong pwesto.

Ang dalawang Star Cinema Film nga ang tanging Filipino Films na nakapasok sa Top 10 na nakipagsabayan sa mga Bigating Hollywood Films kagaya ng Beauty and the Beast,Wonder Woman,Transformers at Logan.

Here’s The Updated List of Top 10 HIGHEST GROSSING FILMS OF 2017(as of July 9’2017):

1. Beauty and The Beast | Walt Disney Pictures | P678M

2. Wonder Woman | Warner Bros. Pictures | P525M

3. Fate of the Furious | United International Pictures | P384M

4. Guardians of the Galaxy Volume 2 | Walt Disney Pictures | P318M

5. Transformers: The Last Knight | United International Pictures | P282.5M

6. My Ex and Whys | Star Cinema | P270M

7. Can’t Help Falling in Love | Star Cinema | P234M

8. Spider-Man : Homecoming | Columbia Pictures | P208.4M

9. Logan | 20th Century Fox | P193M

10. The Mummy | United International Pictures | P173M

Finally Found Someone Earns a Whopping P20M for Opening Day

Muli ngang Pinatunayan ng tambalang AshLloyd na isa sila sa pinakamalalakas na Tambalan pagdating sa Box Office matapos na kumita ng tumataginting na P20M ang kanilang ika apat na Pelikulang FINALLY FOUND SOMEONE.

Eto ang balik tambalan nila matapos ang Record Breaking Third Installment ng kanilang Film Series na It Takes a Man and a Woman na kumita naman ng P405M Locally.

Ang Finally Found Someone ay nagtala rin ng Record bilang Biggest (Local Film) Opening Day For July matapos nitong talunin ang She’s Dating the Gangster First Day Gross of P15M.

Isang Patunay na Patuloy pa rin ang pagkinang ng Kinakikiligang tambalan na AshLloyd.

Sugod na sa pinaka malapit na Sinehan dahil Showing na in over 240 Cinemas Nationwide ang bagong Kilig Film ng bayan.

YOHAN HWANG, ALAY ANG UNANG ALBUM PARA SA MGA PINOY, KOREANO

Awiting Pinoy, dadalhin ng “I Love OPM” winner sa Korean market.





May bonggang kontribusyon sa industriya ng musika ang Korean charmer at “I Love OPM” Grand Touristar na si Yohan Hwang sa paglulunsad niya ng unang album mula sa Star Music na puno ng mga Pinoy covers at Korean versions nito at magiging available sa Melon, ang kilalang online music store sa South Korea.

Tatlong awiting OPM ang nakapaloob sa self-titled album ng poging tsinito na itinuring nang tahanan ang Pilipinas mula taong 2014. Personal niyang isinalin sa Korean language ang mga lyrics nito, at isinama ang kanyang mga bagong bersyon sa album na may hangaring magustuhan ito ng mga Pilipino at kapwa Koreano.

Tampok bilang carrier single ng kanyang unang album ang interpretasyon niya ng “Kung Ako Na Lang Sana,” ang makabagbag damdaming awitin na unang kinanta ni Bituin Escalante. “Nayotdamyon” naman ang titulo ng Korean version nito.

Kasama rin sa covers ng 21-anyos na singer ang “Ikaw” ni Yeng Constantino at ang Korean version nito na “Noege,” pati na rin ang “You Made Me Stronger” ni Regine Velasquez at ang pangalawang bersyon nito na may titulong “Annyeong.” Nagsilbing theme song ng Koreanovela na “Love In The Moonlight” na kamakailan ay umere sa ABS-CBN ang awiting “Noege.”

Bukod sa mga nasabing OPM hits, bahagi din ng kanyang pinakahihintay na album ang “Du Sa Rang,” ang Korean version ng isa sa mga pinasikat na awitin ni KZ Tandingan, ang “Mahal Ko o Mahal Ako.”





Maituturing itong milestone sa kasaysayan ng Star Music sa pagdadala nito ng mga awitin sa Melon music portal sa unang pagkakataon para ipakilala ang OPM na isinalin sa Korean language sa South Korean market sa pamamagitan ng mga awitin ni Yohan.

Unang nakilala ang nasabing singer nang siya ay sumali at nagwagi sa orihinal na singing competition ng ABS-CBN, ang “I Love OPM,” at kasama sa kanyang mga natanggap na premyo ang Star Music recording contract.

Si Rox Santos over-all producer ng “Yohan Hwang” album, na magiging available sa susunod na buwan sa melon.com at sa iba pang digital stores worldwide (Apple iTunes, Amazon.com, etc.), sa Spotify, at sa iba’t ibang record stores sa buong bansa.

Para sa karagdagang impormasyon tungkol sa album ni Yohan, bisitahin lamang ang starmusic.ph  o sundan ang official social media accounts ng Star Music sa facebook.com/starmusicph, twitter.com/starrecordsph at instagram.com/starmusicph.

PAGBIDA NI AWRA SA “WANSAPANATAYM PRESENTS: AMAZING VING” MAS PINANOOD SA BUONG BANSA

Kuwento ng katapangan at pag-ibig, panalo sa puso ng mga manonood

Tinutukan ng mas maraming manonood sa buong bansa ang pag-uumpisa ng kuwento ng kabayanihan ni Ving (Awra) sa “Wansapanataym Presents: Amazing Ving,” kaya naman nanguna ito sa national TV ratings noong Linggo (July 23).

Naging mainit nga ang pagtanggap ng mga tagasubaybay sa unang pinagbibidahang serye ng breakout child star matapos magkamit ang unang episode nito ng national TV rating na 28.8%, kumpara sa katapat nitong “Daig Ka ng Lola Ko” na nakakuha lamang ng 18.5%, ayon sa datos ng Kantar Media. Naging usap-usapan din ito sa social media matapos umani ng libo-libong tweets ang official hashtag ng palabas na #WansaAmazingVing.

Nakilala na nga ng mga manonood ang batang si Ving at natunghayan ang kanyang kabutihan sa pagpapakita niya ng kagandahang asal at pagtulong sa kapwa. Ngunit agad siyang humarap sa pagsubok nang patayin ni Reptilya (Bianca Manalo) ang kanyang inang si Soffy (Carmi Martin) habang patungo sila sa isang outreach program. Muntik na rin malagay sa panganib ang kanyang buhay pero sa tulong ni Super Bing (Ellen Adarna), naligtas si Ving mula sa kapahamakan.

At ngayong nagkrus na ang landas nina Ving at ni Super Bing, mas nalalapit na ang oras ng kanyang pagiging ganap na tagapagligtas dahil mangyayari na ang matinding labanan sa pagitan nina Super Bing at Reptilya na mag-uudyok sa superhero na ipagkaloob ang mahiwagang bato sa binatilyo.

Ano nga kaya ang mangyayari ngayong wala na sa piling ni Ving ang kanyang ina? Makayanan naman kaya ni Ving na matalo si Reptilya? Ano pa kayang pagsubok ang kanyang haharapin bilang si Super Ving?

Kasama rin sa cast ng serye sina Kisses Delavin, Marco Gallo, AC Bonifacio, at Ria Atayde. Ito ay sa ilalim ng direksyon nina Alan Chanliongco.

Ang “Wansapanataym Presents: Amazing Ving” ay karagdagan sa humahabang listahan ng mga kuwentong puno ng aral na inihahandog ng “Wansapanataym.” Sa halos dalawang dekadang pag-ere nito sa telebisyon, naging daan ang programa upang makapagturo ng mga aral na sumasalamin sa pamilyang Pilipino. Tumatak din ang mga palabas nito na nag-iwan ng marka sa puso at nagbigay ng inspirasyon sa mga manonood.

Huwag palampasin ang kuwento ng katapangan at pag-ibig sa “Wansapanataym Presents: Amazing Ving,” tuwing Linggo (July 23) pagkatapos ng “The Voice Teens” sa ABS-CBN at sa ABS-CBN HD (SkyCable ch 167). Para sa past episodes ng programa, pumunta lamang sa iWant TV o sa skyondemand.com.ph para sa Sky subscribers.

Dick at Carmi duo, nagbabalik; KissMarc, sasabak sa unang TV series



Panibagong superhero ang makikilala at kapupulutan ng aral ng mga manonood simula ngayong Linggo (July 23) sa pagganap ng breakout child star na si Awra bilang si Super Ving, ang tagapagligtas na makapangyarihan at may pusong busilak sa “Wansapanataym Presents: Amazing Ving.”

Isang mabait at mapagmahal na anak si Ving (Awra) na pinagmumulan ng kaligayahan ng kanyang mga magulang na sina Cris at Soffy, na gagampanan ng nagbabalik-telebisyong tambalan nina Roderick Paulate at Carmi Martin. Masaya at kuntento si Ving kasama ang kanyang pamilya habang dala-dala ang kanilang paniniwalang sapat ang busilak na puso para maituring ang isang tao na superhero.


Suportado man ng mga magulang, lagi siyang tumpukan ng tukso ng kanyang mga kaklase sa pangunguna ng trending love team nina Kisses Delavin at Marco Gallo bilang sina Chelsea at Warren.

Sa kabila naman nito, patuloy na nagbibigay saya at nag-aaral nang mabuti si Ving upang maabot ang kanyang mga pangarap.

Simpleng namumuhay si Ving sa piling ng kanyang pamilya at mga kaibigan, ngunit magbabago ang lahat nang makilala niya ang superhero na si Super Bing (Ellen Adarna). Dahil sa kabutihang ipinakita ni Ving, magpapalit anyo siya bilang Super Ving matapos ipagkaloob sa kanya ang isang mahiwagang batong nagbibigay-kapangyarihan upang makapagligtas ng tao. Pero bukod sa pagpapanatili ng kapayapaan, may mas malaking misyon siyang kailangan gampanan bilang Super Ving — ang sugpuin si Reptilya (Bianca Manalo) at ang kasamaan nito.

Hindi magiging madali ang misyon ni Super Ving dahil bukod kay Reptilya, marami pa itong kampon na maghahasik ng lagim sa mga inosenteng tao. Ngunit gamit ang kanyang kapangyarihan, sisikapin ni Ving na ipalaganap ang kabutihan at talunin ang kasamaan.

Ano nga kaya ang mga hamong haharapin ni Super Ving ngayong isa na siyang tagapagligtas? Magtagumpay naman kaya si Reptilya sa kanyang masasamang plano? Sapat nga ba ang pagkakaroon ng busilak na puso upang matalo ang kasamaan?

Mapapanood na ang “Wansapanataym Presents: Amazing Ving” simula ngayong Linggo (July 23). Ito ay sa ilalim ng direksyon ni Alan Chanliongco.


Samantala, ang serye ay karagdagan sa humahabang listahan ng mga kuwentong puno ng aral na inihahandog ng “Wansapanataym.” Sa halos dalawang dekadang pag-ere nito sa telebisyon, naging daan ang programa upang makapagturo ng mga aral na sumasalamin sa pamilyang Pilipino. Tumatak din ang mga palabas nito na nag-iwan ng marka sa puso at nagbigay ng inspirasyon sa mga manonood.

Huwag palampasin ang pag-uumpisa ng kuwento ng katapangan at pag-ibig sa “Wansapanataym Presents: Amazing Ving,” simula ngayong Linggo (July 23) pagkatapos ng “The Voice Teens” sa ABS-CBN at sa ABS-CBN HD (SkyCable ch 167). Para sa past episodes ng programa, pumunta lamang sa iWant TV o sa skyondemand.com.ph para sa Sky subscribers.

Ogie Alcasid, ABS-CBN Philharmonic Orchestra, nagsama sa bonggang masterpiece

Pagkatapos ng kanyang pagbabalik sa ABS-CBN nitong nakaraang taon, mayroon na namang malaking pasabog ang OPM icon na si Ogie Alcasid bilang Kapamilya sa kanyang paglulunsad ng unang album mula sa Star Music, ang “Nakakalokal” na isang kakaibang collaboration kasama ang ABS-CBN Philharmonic Orchestra.

Ito ang unang pagsasanib pwersa ng premyadong grupo sa isang solo artist para sa isang album. Kakaibang kombinasyon ang ibibigay ng beteranong singer kasama ang orchestra, sa pangunguna ng music director nito na si Gerard Salonga, para sa mga makikinig at nag-aabang sa pinakabagong mga awiting OPM sa radyo.

“Mas maganda ang tunog ng isang kanta kapag kasama ang orchestra kasi maraming hindi nagagawa ang makina o ang software na nagagawa ng orchestra. Pangarap ko talagang makatrabaho ang ABS-CBN Philharmonic Orchestra at blessing na pumayag sila,” kwento ni Ogie.

Mayroong sampung tracks ang bagong collection ni Ogie, at anim dito ay mga orihinal na komposisyon kasama na ang mga awiting “Nakakalokal,” “Ikaw Ang Tanging Pag-ibig Ko,” “Akala Ko,” “Di Na Muli,” “Di Ka Pababayaan,” at “Do You Wanna Dance With Me.”

Pinaka-excited si Ogie sa “Nakakalokal” single na siyang napiling official theme song ng songwriting competition na Himig Handog Ppop Love Songs ngayong taon.

“Kapag narinig mo siya, maiintindihan mo na ‘ah eto pala ‘yung album ni Ogie.’ Parang binibida niya ‘yung musikang Pinoy,” dagdag nya.

Bukod sa mga bagong awitin, mayroon ding medley si Ogie kasama ang kanyang maybahay, ang OPM icon at Asia’s  Songbird na si Regine Velasquez. Kasama dito ang mga classic hits na “Kailangan Ko’y Ikaw,” “Pangako,” at “Hanggang Ngayon.”

Handog din ng singer-host-actor ang tatlong cover songs sa pinaka-inaabangang album. Kasama dito ang “Kailangan Kita” na theme song ng pelikula mula sa Star Cinema na pinagbibidahan nina Claudine Barretto at Aga Muhlach; “Ikaw Ang Aking Pangarap” mula sa tinangkilik na ABS-CBN teleserye na “Lobo” na pinangunahan nina Angel Locsin at Piolo Pascual; at ang “Ikaw Lamang,” ang theme song naman ng pelikulang “Dubai” ng Star Cinema kasama sina John Lloyd Cruz, Claudine and Aga.

Higit na sa 20 album ang nagawa ng multi-awarded artist na may gold, platinum at double platinum awards. Malaki na ang naging kontribusyon niya sa local music scene sa kanyang mga orihinal na komposisyon, natatanging awitin, at mga nakakatindig balahibong performances.

Ang unang album niya sa Star Music ay prinodyus ni Jonathan Manalo. Ito ay mabibili na sa lahat ng digital stores worldwide. Mabibili rin ito sa lahat ng record bars nationwide sa halagang P350.

Para sa karagdagang impormasyon, bisitahin lamang ang starmusic.ph o sundan ang official social media accounts ng Star Music sa facebook.com/starmusicph, twitter.com/starrecordsph at instagram.com/starmusicph.